*se ou*

Mezanmi kote rach la?

 

Fann bout bwa sa yo pou mwen non epi Met platin nan deyò,Men solèy fin cho wi,jounen an fini nan menm,poum koumanse fè ti kasav la poum sove lajan Gaz ak sik la.

Se ou

Alanjelis tonbe,poko ka degoudi yon mamit dlo poum ta fè yon gwo twalèt poum wè sim ka lage vye kòm li preske jou poum al defann mwen la.

 

Mezanmi men li jou wi, leve non,vin edem sele vye bourik la poum wè sim ka kouri al bay ti kasav yo,poum tounen byen vit,paskem chaje rad sal poum lave demen

image tout9 wendy lerisse

yon bout kòd anba vant li,yon pil rad mare nan yon moso dra,batwèl,zoranj si,savon, kloròx,anba larivyè lesiv la pral fèt.

 

Mèsi Jezi pou jounen sa,men nwit lan nan menw wi bon papa

Priyè sè a

 

Tande non reveye non Nònò mwen pa santim byen non

 

Rete saw saw santi la madanm?

 

A ta sanblem gen doulè wi,rele ti fanm pou mwen tanpri

 

Mezanmi se apènn 1è di maten wi li pral fè, poko ka al frape pòt li non madanm.

 

Bò 10è nan maten lakou chaje moun, doulè tranche a mare pi rèd,pitit di li pap soti,fanm saj la ak pip li lap fimen,pandan lap tann dlo fèy li te mande a poul fè beny pou madanm nan,kèk tan apre fanm saj la mande yon grenn sèl,yon ti sizo,operasyon li pral fè paske tèt timoun twò gwo,li paka soti.

 

Delivrans fèt,anpil remèsiman pou papa Bondye madanm nan bay yon gwo bout pitit fi.

machann tout9 images

Se ou

Pitit mwen,mwen pase anpil mizè ak ou jodi a se lekòl mwen metew,mwen pat konn li,men ou menm,mwen vle pou konn siyen non ou,pran tèt ou,pran tèt ou pitit mwen.

jenn gason alèkile se gate sa yo ye,menm si yo pa gen pou yo baw,yap swete kraze kwiw,kenbe tèt ou pitit mwen.

pawòl manman an

 

Pitit koumanse devlope,ti gason koumanse tyekel,tèt papa cho kou vè lanp,vant manman ap bouyi lajounen kou lannwit.

 

Pitit mwen,paka baw move konsèy non,men jou papaw kwazew ap pale ak ti tonton sa wap pase nan je zegwi.

kounya ou bezwen al gwòs pou pase mizè map pase yo pitit.

 

1)ou konn sak pase?

se tifi ou ye:alanjis pa gen dwa pranw nan lari

2)se tifi ou ye:koze al kay ti gason an pa pou ou

3)se tifi ou ye: ou paka nan fè jenn gason plezi

4)se tifi ou ye:aprann fè manje,pase,avanw koumanse renmen an

5)se tifi ou ye:ou pa dwe lage kòd tèt ou, nan griyen dan ak ti gason

6)se tifi ou ye:depiw gwòs koze lekòl la fini pou ou

7)se tifi ou ye:ou gwòs nan kay la,se nan lari a wap pranl.

8)se tifi ou ye: lannwit paka pranw ap pale ak ti gason

9)se tifi ou ye:se gason ki pou fèw deklarasyon

10)se tifi ou ye:,depiw tonbe,levew pap fasil non pitit mwen,menm si yo toujou di fanm gen 7 so poul pran.

konsèy primòdyal majorite gran paran yo.

 

Enben wi se ou

Ou se fanm

Fanm ki vle di ou gen kouraj,rezistans,pasyans.

 

Wi se ou

Fanm ki vle di konpreyansyon,sansibilite,afeksyon

 

Wi se ou

Fanm ou men  ki gen tout chaj kritik  tout yon sosyete sou dow la.

 

Wi se ou

Fanm ki soti nan zo kòt gason an.

Fanm ki kwè nan pataje lanmou,menm siw pa gen dwa pou resevwa lanmou an.

 

Wi se ou

Fanm ki dwe renmen,menm si yo  pa menm apresyew

 

Wi se ou

Fanm  ki souvan blese,trayi,vyole, imilye,meprize.

machann tout9 images

Wi se ou

Fanm yon jou ki te gwòs gason kouri kitew,paranw abandonew, zanmiw meprizew, sosyete kondanew. gwòs timoun sa te pi gwo krim ou fè.

Jodi a ou se manman wè pa wè,tout kouch nou site la ki te bliyew yo, ap kontew pami manman tou jodi a.

Wi se ou

Wi se ou

Ou se fanm.

Fanm ki gen grenn

Fanm ki pa pote wòb li pou bèl twèl

Vin taye bandaw pou kotew soti ki fèw manman jodi a.

 

Bon kouraj manman fanm.

ekri pa: Chachou DUROSE email: durosechachou@gmail.com

kameramann: Wendy LERISSE

koute radyo tout9 andirek sou lyen sa a: tout9.net/radiotout9

NB: ou vle fe yon mesaj pase sou tout9 ekri nou sou email sa a: senatjephte4@gmail.com

Mèsi deja

li atik ki menm jan ak li: http://tout9.net/yon-sel-espwa-se-vwayaje-durose-chachou-tout9-istwa-lakay/

renmen page facebook nou an sou lyen sa a: https://web.facebook.com/senatjephte4/